ప్రాపర్టీ కొనుగోలు ప్రక్రియలో లావాదేవీ పూర్తయ్యే దాకా పలు దశలు ఉంటాయి. ప్రతీ దశలోనూ డీల్ కుదుర్చుకునేందుకు అవసరమైన డాక్యుమెంటరీ ఆధారాలను చూసుకున్నాక విక్రేత, కొనుగోలుదారు అమ్మకం ఒప్పందాన్ని కుదుర్చుకుంటారు. ఒప్పందం ఫార్మాట్ అనేది అగ్రిమెంట్ ఫర్ సేల్ లేదా సేల్ డీడ్ రూపంలో వేర్వేరుగా ఉండవచ్చు. అగ్రిమెంట్ ఫర్ సేల్ అనేది భవిష్యత్తులో ఒక ప్రాపర్టీని విక్రయించేందుకు కుదుర్చుకునే ఒప్పందం. సదరు ప్రాపర్టీని బదలాయించేందుకు నిర్దుష్ట షరతులు, నిబంధనలను ఈ ఒప్పందంలో పొందుపరుస్తారు. ట్రాన్స్‌ఫర్ ఆఫ్ ప్రాపర్టీ యాక్ట్ 1882లో దీనికి సంబంధించిన నిర్వచనం ఉంటుంది. దీని ప్రకారం నిర్దిష్ట షరతులు, నిబంధనలకు లోబడి మాత్రమే ప్రాపర్టీని భవిష్యత్తులో బదలాయించడం జరుగుతుందంటూ అగ్రిమెంట్ ఫర్ సేల్‌లో స్పష్టంగా ఉంటుంది.
అగ్రిమెంట్ ఫర్ సేల్ కుదుర్చుకున్నంత మాత్రాన ప్రతిపాదిత కొనుగోలుదారుకు సదరు ఆస్తిపై హక్కులేమీ వెంటనే దఖలుపడవు. సేల్ అగ్రిమెంటు కుదుర్చుకున్నప్పుడు నిర్దిష్ట నిబంధనలకు లోబడి సదరు ప్రాపర్టీని కొనేందుకు కొనుగోలుదారుకు హక్కులు లభిస్తాయి. అలాగే, తన వంతు షరతులు, నిబంధనలు పాటించడాన్ని బట్టి కొనుగోలుదారు నుంచి ఒప్పంద మొత్తాన్ని పొందేందుకు విక్రేతకు హక్కులు దఖలుపడతాయి. ఒకవేళ ఒప్పందం ప్రకారం ప్రాపర్టీని విక్రేత విక్రయించలేకపోవడం లేదా అందజేయలేకపోయిన పక్షంలో స్పెసిఫిక్ రిలీఫ్ యాక్ట్ 1963 చట్టం కింద కొనుగోలుదారుకు నిర్దిష్ట చర్యలు తీసుకునేందుకు హక్కులు ఉంటాయి. అలాగే కొనుగోలుదారు కూడా నిబంధనలకు లోబడి వ్యవహరించకపోయిన పక్షంలో తన ప్రయోజనాలను కాపాడుకునేందుకు విక్రేతకు కూడా నిర్దిష్ట హక్కులు ఉంటాయి. అగ్రిమెంట్ ఫర్ సేల్‌పై సంతకం చేసినంత మాత్రాన విక్రయ లావాదేవీ పూర్తయినట్లు లెక్క కాదు. డీల్ పూర్తయ్యే దిశగా ఇది మరో కీలక అడుగు మాత్రమే. అందుకే అగ్రిమెంట్‌లో పేర్కొన్న షరతులు, నిబంధనల గురించి కొనుగోలుదారులు క్షుణ్నంగా తెలుసుకోవాలి. సాధారణంగా కొనుగోలుదారు డబ్బు పూర్తిగా చెల్లించేదాకా ప్రాపర్టీ అనేది వారి పేరిట బదిలీ కాదు. అగ్రిమెంటు కుదుర్చుకున్నప్పటికీ కొన్ని సందర్భాల్లో కొనుగోలు ధరను చెల్లించేందుకు చాలా సమయం పట్టేయొచ్చు. అయితే, నిర్దేశిత ఒప్పంద మొత్తాన్ని కొంతకొంతగా కడుతూనే కొనుగోలుదారు సదరు ప్రాపర్టీ పొజెషన్ తీసుకోవచ్చు. పూర్తి విలువ చెల్లించిన తర్వాత సేల్ డీడ్ పొందవచ్చు. ఉదాహరణకు A అనే వ్యక్తి తన ఇంటిని విక్రయించాలని యోచిస్తున్నారనుకుందాం. అయితే, తనకు మొత్తం డబ్బు ఒకేసారి అవసరం లేదు. అలాగే B అనే వ్యక్తి ఆ ఇంటిని కొనాలని అనుకుంటున్నా.. ప్రాపర్టీ విలువ మొత్తాన్ని చెల్లించేంత డబ్బు తన దగ్గర లేదు. అలాంటప్పుడు B కొద్ది కొద్దిగా కొనుగోలు మొత్తాన్ని వాయిదా పద్ధతుల్లో కట్టే విధంగా A, B నిర్దిష్ట అగ్రిమెంట్ ఫర్ సేల్ కుదుర్చుకోవచ్చు. B పూర్తి మొత్తాన్ని చెల్లించేశాక ప్రాపర్టీపై హక్కులను పూర్తిగా బదలాయిస్తూ సేల్ డీడ్ కుదుర్చుకోవచ్చు.
అగ్రిమెంట్ ఫర్ సేల్ కుదుర్చుకోవడానికి వివిధ కారణాల రీత్యా అత్యంత ప్రాధాన్యత ఉంటుంది. విక్రేత, కొనుగోలుదారుకు మధ్య చట్టబద్ధంగా ఒక ఒప్పందం కుదిరిందనేందుకు, వివాదాలు తలెత్తిన పక్షంలో భవిష్యత్ కార్యాచరణ ప్రణాళిక ఎలా ఉండాలనేందుకు ఇది ప్రాతిపదికగా ఉంటుంది. ఒకవేళ మీరు గృహ రుణానికి దరఖాస్తు చేసుకుంటున్న పక్షంలో సాధారణంగా మీరు అగ్రిమెంట్ ఫర్ సేల్ కుదుర్చుకునే దాకా బ్యాంక్ మీ దరఖాస్తును ఆమోదించకపోవచ్చు.
ఇక, కొనుగోలుదారు ఒప్పంద మొత్తాన్ని చెల్లించేసి, విక్రేత ప్రాపర్టీ హక్కులను వాస్తవంగా బదిలీ చేసినప్పుడు సేల్ డీడ్ డాక్యుమెంట్‌ను రూపొందిస్తారు. దీనికి అగ్రిమెంట్ ఆఫ్ సేల్ పత్రం ప్రాతిపదికగా ఉంటుంది.